彰化好所在 - 鄭美 ( 詞:李逢慶 )

 

古早彰化叫半線　上介出名八卦山
山頂大佛人愛看　山腳寶地不老泉

 

 

社頭針織有出名　百般花草綴時行
外國人客走來訂　銷滿世界好名聲

 

鹿港名產逐項好　神椅神桌技藝高
蚵嗲蝦猴人阿咾　作客伴手鳳眼糕

 

眾人過冬攏食補　溪湖出名羊肉爐
羊肉補冬身勇固　寒天毋驚腳踏土

 

提起織布看和美　生產機器重科技
絕對毋是靠運氣　品質出名達千里

 

芬園楓坑出米粉　食著米粉若騰雲
開脾健胃解心悶　米粉好食慢慢吞

 

秀水特產胡仁豆　挽豆曝日若出操
逐日空運拼出口　銷去日本佔大頭

 

田尾特色是花田　袂輸荷蘭鹿特丹
艷麗色彩百樣款　來遮賞花好休閒

 

員林出名鹹酸甜　第一好食檨仔青
病囝來食好滋味　也會治好病相思

 

竹塘出名濁水米　三頓食飯好開脾
四界攏是真搶市　祕訣落肥用有機

 

巨峰葡萄出大村　人人駛車來交關
葡萄好食愛即款　無下農藥上安全

 

紹介到遮欲歇睏　通知列位眾諸君
名產愛試則會準　雞歸我袂烏白歕

 

祝福您在座的員林的好朋友
轉去平安年年春